နာတာရှည်နာကျင်မှုကြောင့် ဖြစ်ပေါ်တဲ့ အိပ်မပျော်ခြင်းအတွက် အကြံဉာဏ်များ

နာကျင်မှုက ကျွန်မတို့ကို စိုးရိမ်ပူပန်မှုတွေ ဖြစ်စေပါတယ်၊ ကျွန်မတို့ရဲ့ နေ့စဉ်အလုပ်တွေကို အကောင်အထည်ဖော်ရာမှာလည်း အတားဆီးတစ်ခုဖြစ်စေပြီး လူမှုဘဝကိုပါ ထိခိုက်စေပါတယ်။ ပြီးတော့ ညဘက်မှာ ကောင်းမွန်စွာ အိပ်စက်အနားယူခြင်းကိုလည်း တားဆီးပါတယ်။ တကယ်တော့ နာကျင်မှု ကြာရှည်လာတဲ့အခါ သင့်ရဲ့အိပ်စက်မှုကို ဆိုးရွားစွာ ထိခိုက်စေပါတယ်။ ဒီဆောင်းပါးလေးမှာ နာတာရှည်နာကျင်မှုကြောင့် အိပ်မပျော်ခြင်းအကြောင်းကို ပြောပြပေးချင်ပါတယ်။

သင့်ဘဝမှာ တစ်ချိန်ချိန်ကျရင် သိသိသာသာနာကျင်မှုမျိုးကို ခံစားရနိုင်ပြီး ညအချိန်ရောက်မှာတောင် ကြောက်ရွံ့ခြင်းကို သင်တွေ့ကောင်းတွေ့ပါလိမ့်မယ်။ ဘာလို့လဲဆိုတော့ နာကျင်မှု ခံစားချက်တွေက ပြင်ပလှုံ့ဆော်မှုမရှိခြင်းကြောင့် ပိုပြင်းထန်လာလေ့ရှိပါတယ်။ ဒါ့ကြောင့် အလွန်အမင်း စိတ်အလိုမကျဖြစ်ကာ အိပ်ပျော်ဖို့ မဖြစ်နိုင်ပါဘူး။ နာတာရှည်နာကျင်မှု ခံစားနေရသူတွေအတွက် ဒီအရာက သူတို့ရဲ့နေ့စဉ်ဘဝမှာ ဆက်တိုက်ဖြစ်လာပါတယ်။

နာတာရှည်နာကျင်မှု

နာကျင်မှုက မတူညီတဲ့နည်းလမ်း ၂ခုနဲ့ သူ့အလိုလို ပေါ်လာနိုင်ပါတယ်။ ပြင်းထန်တဲ့နာကျင်မှုက မကြာသေးခင်က ဒဏ်ရာ (သို့) ပြဿနာတစ်ခုနဲ့ ဆက်စပ်ပြီး ဖြစ်ပေါ်ပါတယ်။ အချိန်အကန့်အသတ်ရှိပြီး ခန္ဓာကိုယ်ပြန်လည်ကျန်းမာလာတဲ့အခါ ပျောက်ကွယ်သွားပါတယ်။ တဖက်မှာ နာတာရှည်နာကျင်မှုက သုံးလထက်ပိုကြာနိုင်သလို မူလရောဂါက သူ့အလိုလို ပြေလည်သွားပြီးနောက်ပိုင်း တစ်လကြာတဲ့အထိ ကျန်ရှိနေနိုင်ပါတယ်။ တစ်ချို့အရိုးအဆစ်နာကျင်မှုတွေဆိုရင် ပေါ်လိုက်ပျောက်လိုက်နဲ့ တစ်သက်လုံးခံစားရနိုင်ပါတယ်။ နာတာရှည်အဖြစ်အများဆုံးရောဂါတွေက-

အဆစ်နာခြင်း၊ အရိုးအဆစ်နာခြင်းနှင့် ဒူလာရောဂါ
ခေါင်းကိုက်ခြင်း၊ ခေါင်းတစ်ခြမ်းကိုက်ခြင်း
ကင်ဆာ
အာရုံကြောပျက်စီးခြင်း
Fibromyalgia ရောဂါ
စိတ်ဒဏ်ရာနဲ့ ရောဂါကူးစက်မှုများ

နာကျင်မှုက အိပ်စက်ခြင်းကို ဘယ်လိုသက်ရောက်မှုရှိသလဲ?

အိပ်မပျော်ခြင်းက နာတာရှည်နာကျင်မှုရဲ့ နောက်ဆက်တွဲတစ်ခုသာ ဖြစ်ပါတယ်။ နာတာရှည်နာကျင်မှုဝေဒနာ ခံစားနေရသူ ၅၀ မှ ၈၉ရာခိုင်နှုန်းခန့်ဟာ အိပ်စက်မှု ပုံမမှန်ခြင်းနဲ့ ဘဝအရည်အသွေးညံ့ဖျင်းကြောင်း တွေ့ရှိရပါတယ်။ နာတာရှည်နာကျင်မှုနဲ့ ဆက်စပ်သော အိပ်မပျော်ခြင်းက အဓိကအားဖြင့် အိပ်ပျော်ဖို့ ခက်ခဲခြင်း၊ နာကျင်မှုကြောင့် ညဘက်မှာ မကြာခဏနိုးခြင်း၊ အိပ်ရေးမဝခြင်း၊ စောစောနိုးခြင်း တို့ဖြစ်ပါတယ်။ ထို့အပြင် အနားယူမှုနဲ့ နာကျင်မှုအကြားဆက်နွယ်မှုက နည်းလမ်း နှစ်ခုဖြင့် လုပ်ဆောင်တာကို သတိပြုဖို့ အရေးကြီးပါတယ်။ နာကျင်မှုက လူတစ်ယောက်အား ကောင်းမွန်စွာ အနားယူခြင်းကနေ တားဆီးထားပါတယ်။ အိပ်ရေးပျက်ခြင်းက နာကျင်မှုတွေရဲ့ ခံစားချက်တွေကို ပိုဆိုးရွားစေပါတယ်။ ထို့ပြင် နှစ်နှစ်ခြိုက်ခြိုက် အိပ်မပျော်တဲ့အခါ နာကျင်မှု သက်သာစေဖို့ သုံးတဲ့ဆေးတွေေရဲ့ ထိရောက်မှုကိုလည်း ဆုံးရှုံးစေပါတယ်။

ဘာလုပ်နိုင်မလဲ?

မွန်းလွဲပိုင်းမှာ ကော်ဖီ၊ လက်ဖက်ရည်၊ သကြားနဲ့ အခြားအားကြွစေတဲ့ဆေးတွေ သောက်တာကိုရှောင်ကြဉ်ပါ။ ထို့အတူ စောစောနိုးတာကို ဖြစ်စေနိုင်တာကြောင့် အရက်မသောက်ဖို့ ကြိုးစားပါ။
အိပ်ရာမဝင်ခင် ရေနွေးနွေးလေးနဲ့ ရေချိုးပါ။ ဒါက နာကျင်မှုကို သက်သာစေပြီး နှစ်ခြိုက်စွာ အိပ်စက်ခြင်းကို အားပေးတဲ့ အပန်းပြေမှုအခြေအနေကို ဖြစ်ပေါ်စေပါတယ်။
ပတ်ဝန်းကျင်အခြေအနေ ပြည့်စုံမှုရှိစေဖို့ သေချာပါစေ၊ အမှောင်၊ တိတ်ဆိတ်မှုနဲ့ အပူချိန် ၂၁ဒီဂရီဝန်းကျင်ရှိနေဖို့ အကြံပြုပါတယ်။
အိပ်ရာထဲမှာ အနာယူခြင်းမှလွဲပြီး အခြားဘယ်အရာကိုမဆို ရှောင်ပါ။ ဥပမာ- ထမင်းမစားပါနဲ့၊ တီဗီမကြည့်ပါနဲ့။
အားလပ်ရက်တွေမှာတောင် ပုံမှန်အိပ်ချိန်အတိုင်းအိပ်ပါ။ ဒါ့အပြင် ခန္ဓာကိုယ်အတွက် အသင့်တော်ဆုံးအချိန်ဖြစ်တဲ့ ည၁၁နာရီထက်စောပြီး အိပ်ရာဝင်ဖို့ ကြိုးစားပါ။
နာတာရှည်နာကျင်မှုကြောင့်ဖြစ်တဲ့ အိပ်မပျော်ခြင်းကို ကာကွယ်ဖို့နဲ့ စီမံဖို့ ခက်ခဲပါတယ်။ သို့သော် ဖြေရှင်းနည်းအချို့ရှိပါတယ်။ အမှန်တော့ ဒီလိုပြဿနာမျိုးခံစားနေရရင် ဆရာဝန်ကို ပြောဖို့မတွန့်ဆုတ်ပါနဲ့၊ အရည်အသွေးကောင်းမွန်သော အိပ်စက်ခြင်းက ကိုယ်ကာယနှင့် စိတ်ပိုင်းဆိုင်ရာ ကျန်းမာချမ်းသာမှုအတွက် မရှိမဖြစ်လိုအပ်ပါတယ်။ ဒါ့ကြောင့် အိပ်စက်ခြင်းကို တတ်နိုင်သမျှ အမြဲဂရုစိုက်သင့်ပါတယ်။