အလြယ္တကူျပုလုပ္နိုင္ေသာ သဘာဝ မ်က္ႏွာသန႔္စင္ ဂ်ယ္လ္ ကိုယ္တိုင္ျပဳလုပ္နည္း

နေ့တစ်နေ့တာရဲ့ မနက်ခင်းနဲ့ နေ့လယ်ခင်းတွေမှာ ရုံးသွားတာဖြစ်ဖြစ် အလုပ်သွားတာဖြစ်ဖြစ် ပွဲလမ်းရှိလို့အပြင်ထွက်တာမျိုးဖြစ်ဖြစ် အပြင်ထွက်ဖို့ ကိစ္စတစ်ခုခု ရှိနေတယ်ဆိုရင် ပျိုပျိုမေတို့ရဲ့မလုပ်မဖြစ် လုပ်လေ့ရှိတဲ့ အလုပ်တစ်ခုကတော့ မိတ်ကပ်လိမ်း အလှပြုပြင်ခြင်းပါပဲ။

ဒီလို မိတ်ကပ်လိမ်းပြီး အပြင်ကိစ္စတွေ သွားလာပြီးရင် အိမ်ပြန်ရောက်တဲ့ အခါမှာ မဖြစ်မနေလုပ်သင့်တဲ့ အလုပ်ကတော့ ညအိပ်ရာမဝင်ခင် လိမ်းထားတဲ့ မိတ်ကပ်တွေကို ပြန်ဖျက်ဖို့ပါပဲ။

ဘာကြောင့်လည်းဆိုတော့ ညအိပ်ယာဝင်တဲ့အခါ မိတ်ကပ်တွေကို မဖျက်မိဘူးဆိုရင် ချွေးပေါက်တွေထဲ အညစ်အကြေးတွေ ပိတ်ဆို့ပြီး ဝက်ခြံ ထွက်လွယ်တာမျိုးစတဲ့ အရေပြား ပြဿနာတွေများစွာ ဖြစ်လာနိုင်လို့ပဲ ဖြစ်ပါတယ်။

သင် မိတ်ကပ်ဖျက်တဲ့ အခါမှာ သဘာဝအတိုင်း မိမိကိုယ်တိုင်ပြု လုပ်ထားတဲ့ cleanserလေးနဲ့ ဖျက်မယ်ဆိုရင် ဓာတုဆေးဝါးအန္တရာယ် ကင်းဝေးစေပါတယ်။ ဒါကြောင့်မို့ ကိုယ်တိုင် ပြုလို့လို့ရနိုင်တဲ့ Rose Water Cleansing Gel လေးကို ပြုလုပ်ကြည့်ကြပါစို့။

အရင်ဆုံး ဖော်စပ်ဖို့ လိုအပ်တာတွေ ကတော့…
နှင်းဆီပွင့်ဖတ်ရည် ခွက်တစ်ခွက်ရဲ့ လေးပုံ တစ်ပုံစာ။
ရှားဇောင်းလက်ပတ်အနှစ် ထမင်းစားဇွန်း တစ်ဇွန်း။
ဂလစ်ဆရင်း ထမင်းစားဇွန်း တစ်ဝက်
Castile soap ထမင်းစားဇွန်း လေးပုံ တစ်ပုံစာ။ (စူပါမားကက်များတွင် ရနိုင်ပါသည်)

Rose Essential Oil အစက် အနည်းငယ်ခန့်။

ပြုလုပ်နည်း. … ဦးစွာ သန့်စင်သော ပန်းကန်လုံး တစ်လုံးထဲကို နှင်းဆီပွင့်ဖတ်ရည် ထည့်ပါ။ နောက်ပြီးရင် ရှားဇောင်းလက်ပတ်အနှစ် ပေါင်းထည့်ပါ။ ပြီးရင် Castile Soap ကို ပါဝင် အချိုးအဆအတိုင်း ထည့်ပါ။

အဲ့သည်အထဲကို ဂလစ်စရင်းထည့်ပြီး မွှေပေးပါ။ နောက်ဆုံးမှ Rose Essential Oil အစက်အနည်းငယ်ခန့်ကို ထည့်ပြီး သမအောင် မွှေပါ။ မွှေတဲ့အခါမှာ အမြှုပ်များမထဖို့ သတိထားပါ။

ပြီးတဲ့အခါ ပုလင်းတစ်လုံးထဲ ထည့်ပြီး သိမ်းလိုက်ပါ။ ခြောက်သွေ့အေးစက်တဲ့ နေရာမှာ သိမ်းမယ်ဆိုရင်တော့ ၇ရက် ကျော်ထားခံပါတယ်။ ရေခဲသေတ္တာထဲမှာ သိမ်းထားမယ် ဆိုရင်တော့ ဆယ်ရက်နဲ့ အထက် အထားခံမှာ ဖြစ်ပါတယ်။

အသုံးပြုနည်း….. Cotton pad မှာ အဲ့ဒီ့gelကို အနည်းငယ်ဆွတ်ပါ။ ပြီးရင်အဲ့ဒီ့ cotton pad နဲ့ သင့်မျက်နှာပေါ်က မိတ်ကပ် အညစ်အကြေးနဲ့ အဆီများကို ဖယ်ရှားပစ်လိုက်ပါ။ ရေနွေးနွေးနဲ့ မျက်နှာသစ်လိုက်ပါ။

မျက်နှာကို ခြောက်သွေ့အောင် သုတ်ပြီး အစိုဓာတ်ထိန်း ခရင်မ်အပျော့စားကို လိမ်းလိုက်ပြီး အိပ်စက်လိုက်ပါ။ သင်ကိုယ်တိုင် ပြုလုပ်ထားတဲ့ သန့်စင်သော သဘာဝ မျက်နှာသန့်စင် ဂျယ်လ်နဲ့ သင့်အလှကို ကြွရွစေလိုက်ပါ။

စန္ဒီမြင့်မိုရ်